Yèr soir, in bonpé télé la tourn zot program déssi Barack Obama, lo nouvo prézidan Lamérik (banna i apèl sa Zétazini) : in prézidan métis pou in foi, issi nora di sé in kaf klèr ; A ! Lo tan la shanjé Baya ! Mi pans la télé la fé ékspré pou fé pass lo fime “Rasine” : i amontr koman zénérasion an zénérasion lo droi bann noir la goumanté, mé koman bann moun té oblizé lité é pa arienk’in pti koup de tan ;
Biensir, i fo pa kroir pèr Noèl, i fo pa pans le boug va fé mirak par li tousèl, i fo pa oubli koman lékonomi Lamérik lé sinistré koméla ; i fo pa majine sak le boug i vé fèr li va fé konm par in tour d’mazik. Biensir, i fo pa ni nior dann kèl sistèm sosial, ékonomik é kiltirl banna i viv... Dizon, i fo pa kroir lo nouvo prézidan va fé in révolission.
Kansréti, omoins si li fé fèrm la prizon Guantanamo, si omoins li vanz vréman kont bann gaz a éfé d’sèr pou défann in pé la kalité lanvironman, si li sèy fé son possib pou fé arète déssèrtin guèr. Si li rogard in pé bann Paléstinien, si li fé in zès pou zot. Sar déza sa ! Sar déza mié ; konm di lo kont, sar mié k’si lété pir.
Mé nou mèm, mi domann amoin kossa ni pé fèr pou pous in pé an montan lo droi demoun sak lé pa égal konm lé z’ot vik i di souvan nana in pé lé pli égal ké lé z’ot. Kisa mi pans moin la ? Mi pans tout bann désandan zésklav, désandan zangazé, komor, malgash la vni rod in tik-tak pou gonf in pé z’ot pla é mi di : "Si rasism té i pé dékil inpé, sré valab !". Mé pétèt, in pé i pans nou lé dann in sosiété na pi d’rasism, tout kiltir nana mèm droi, tout moun lé bien konsidéré... malérèzman, pou mon par, mi pans sa lé pa vré, mi pans nana ankor pou fé ! slèy i klèr amoin !
A, si solman lo zéléksion Obama té i pé amènn anou a oir lé shoz konm zot i lé, é pa konm nou l’apré déguizé. Si solman la viktoir Obama i pé ède anou marsh in pé plis dann diréksion légalité, pa pou plèr déssi nout passé, mé pou mète l’om rénioné anlèr, é anlèr pou vréman. Pou nou, sré konm in révolission, in shanjman bien nésésèr !

Justin