Bann z’ansyin i di souvann foi, kalkil byin, pran out tan, réfléshi avan ou i tonm d’akor avèk in moun... avan ou i di ou lé dakor... pou donn in n’afèr, vann sansa loué kékshoz pars si ou la fine done parol ou i rovyin pi an aryèr.
Sa sé in n’afèr séryé pars sansa, si kossa ou i baz ? Si pou in oui, pou in non, demoun i dévir zot palto... alors, l’èr-la mi oi pi dann kèl modèl sosyété nou la fine tonbé. Pou moin, fransh vérité, "parol doné, sé parol sakré !"

Dizon sa lé vré rant bann partikilyé, sa lé vré ankor plis kan ou nana lo pouvoir, kan ou lé fine tonm d’akor ou i trok pi d’parol, ou i réspèk a li. Pars sansa, i fo sign papyé toultan ! Solman si ou i réspèk pa oute parol, ou i répèkt ar pa oute ékri. Si ou i trok parol, pou kossa ou i trokré pa out ékri ?

Poitan,s é sak Bogoss promyé, lo roi La Réjyon la parti domann gouvèrnman. Li la domann banna tir in tré déssi zakor Matignon é li di banna la done z’ote akor "de prinsip"... ziska zordi gouvèrnman la pankor kozé, li pa di oui, mé li la pa di non non pli. Poitan sa lé signé sa zakor Matignon par in promyé minis, par in minis l’intéryèr, par l’fète prézidan La Répiblik zordi.
Sa lété signé par lo prézidan La Réjyon, dann tan-la… Alors, in zakor,sa i réspèkt pa ? Alors, ni artourn konm dann tan, in gran shèf l’État, in sèrtin Bismarck... té pa in gran z’ami d’La Franse...i parétré té i di : "In trété sé konm in shifonn papyé"

 Justin