Pou tout bann partizan nout lang rézional, lang kréol La Rénion na poin riyink bon nouvèl koméla. Tout ti-pa nou la fé avèk bann moun bone volonté, aforstan la passians, aforstan lité par dsi lité, i rossanm in bann i vé arkassé. Gouvèrnman li mèm i diré la pa préssé pou armèt an ord bann bétiz gouvèrnman avan la fé.

Nout bann dalon dan la Frans, sak i vanj pou zot lang réjional, i signal anou la-ba galman, zot nana problèm pou kontinié amontr zot lang réjional épi zot kiltir... Kan zot téi kroi, kan zot téi souèt alé, in pé pliss dovan dann zot projé, zot i apèrsoi na in pé i vé ral déyèr.

Rézman, tazantan in bon nouvèl i ariv :
Samdi soir, ni oi dann Télé i amontr in mariaz an kréol, dan la komine Sin-Pol. La marié la fé sa konm in sirpriz pou son mari. Le mari té fièr, épi nou, nou té kontan akoz nout kréol téi may ansanm lamour. Té konm in sign pou di anou : "Pèrd pa kouraz ! Kontinié lité !". Konm si lo déstin la bat in zié èk nou, konm in féklèr dann ti-fé noir.

Justin