Zot i rapèl kan gouvèrnman la France té i vé fé pass ali pou in shanpyon dann la défans l’anvironman, é pou vanj kont l’éshofmann klima. Zot i ansouvyin kan la roganiz lo Grenelle l’anvironman. Kan l’ariv pou fé vote la loi Grenelle 1, lé vré, in pé la di sa la pa a la otèr d’sak i fo fèr vi k’la sityasion lé grav, mé la plipar bann z’élu, dépité konm sénatèr, la vote pou sa. Kan l’ariv lo loi Grenelle 2, so kou issi, aryink bann dalon gouvèrnman la vote pou sa, lé zot la pa voté, pars sa té i konvyin pa.
Issi, la Rényon, bann minis, mèm lo prézidan la vni pran la parol koté in moun l’avé zamé fé aryin, ni pou dévlop lo péi, ni pou lo dévlopman dirab. Mi ansouvyin mèm, dann zournal té ékri, lo prézidan la fé in réfléksyon pou dir li té la, an parmi l’moun, la té pa d’akor avèk li, pou dévlop bann zénèrzi prop, é pou trap nout lotonomi dann l’énèrzi. Sa té i éspass dann Tampon, koté lo mèr, zordi prézidan Konsèy réjyonal… gran démolissèr dovan l’étèrnèl.
Zordi, i antann dir, lo minis lo Bidzé va tash moiyin konomiz larzan déssi la politik l’anvironman… dé milyar par-la. Zordi ou i aprann lo prézidan* Gip-Gerri la démissyoné é gouvèrnman la pankor ranplas ali… i di mèm i sava dissoude lo Gerri. É dir la vni fé diskour la-dsi, la di i sava mète La Rényon anlèr. In foi an plis, ni apèrsoi kan i kroi pa in n’afèr, i sava pa byin loin. I fé bann plan déssi la komète zordi, pou anvoy dingué domin. Dizon, in bann gouté-largué... pa plis, pa moins.

Justin

* lo prézidan Gerri lété méssyé Chateauvieux.
Gip-Gerri : Green Energy Revolution Reunion Island
gouté-largué : a pène la fine gouté, lé déza rassazyé