Dan la grann sal la préféktir, lavé demoun so zour-la : demoun byin konvnab, byin prop, i sort déor ou la plipar, épi d’ot moins konm k’i fo, la pousyèr shomin déssi zot linz, demoun in pé tout koulèr, i sor kriy an kriyèr d’nuit mé la zourné.
Demoun lé pa kontan pars lé shoz i marsh pa konm k’i fo. In koté bann gran fonksyonèr, bann patron, bann zékspèr ; épi l’ot koté, bann sindika, bann lasosyasyon, bann shomèrŠ la valtay koi ! Épi, rant lé dé, mé plis avèk lé z’enn k’avèk lé z’ot, konm in pti zonm vèr i oi défoi dann déssin animé.

Po d’fèr kont po d’tèr ? Kisa k’i gingn, kisa k’i anpèrd ? Kisa po d’fèr, kisa po d’tèr ?

Lo promyé group demoun, anroulé dann zot gran fish dé paye pou la plipar, dovan z’ot shèf k’i ankouraz azot, lé paré pou kasé pou brizé an parol, lé paré pou kraz so bann san konprann, so bann pou, so bann zinsèk k’i rode anbar la bone sosyété d’kontoir. Zot lé paré, mé i fo séyé pou oir !

Épi, ala k’baton i shanj de bout, ala k’bann konésèr i koné pi vréman. Ala k’sak i koné lo térin, sak i koné la lite, i gingn lo déssi, pti-lanp-pti lanp, firamézirŠ Sign-la ! sign-la ! lo shèf i di, mé bann COSPAR i vé pa ékout ali ; i di ali, i fo tonm d’akor avan ! Oté lé ga, lé pi parèy kan la komansé, okilé l’orgèy bann vaza ? Okilé zot grimas la sipéryorité ?
Tansyon pangar, tansyon COSPARŠ Konm k’i diré dann kozman maloya, bann vayan moyanbane l’arivé !

 Justin