Karapat ? in pé i apèl sa tik galman. Sa sé in salté d’bébète sa, li kal dann bann l’androi sansib épi li gonf ali avèk lo san. Oplis li sis lo san, oplis lo pov z’animo i pèrd la fors épi i mégri. I paré li la bézoin sa pou li ponn épi pou li fé son pti. Kan li mont dsi tété bèf mèg é ké lo propriyétèr i done pa li l’élan, kansréti avèk lo dsèl-lontan té i fé bingn bèf dan la mèr-lo bèf, mal soigné i dékline ankor in pé.

Kisa lé konmsa ? Sak i viv dsi la mizèr lé z’ot konm bann moun i loué bidon-vil par ébzanp, konm magazin i vann bann marshandiz tro shèr.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan dakor rantre nou.