Mon bann dalon, zot i koné kan lé shoz i marsh bien, toulmoun li lé bo, toulmoun li lé zantiy. Kan lé shoz i marsh bien, ou i ramas solman konpliman, zoli kozé, karès é konpagni. La vi lé konmsa ! Mé mazine in kou lo van i tourn ! Mazine in kou lé shoz i roul pa ron ! L’èr-la, la pi bon ditou. N’inport ki, nana i n’afèr pou tir dsi ou, in roprosh pou fé, in mové konpliman pou anvoyé, ébin li ézite pa. Mèm dan la fab, kan lo lyon la vni vyé, ziska bourik la foute ali in kou d’sabo.

Sanm pou moin sé sak l’apré ariv lo pti prézidan Sarko. Pou komansé, bann moun té pa dann son parti li la drag azot pou afayir lopozisyon la dévir kont li. In pé la ziska di, lo ra i kite lo bato. Aprésa, mèm déssèrtin an parmi son bann partizan la dévir lo do avèk li, pou domann bann zéléktèr vote pou François Hollande. Arzout èk sa, bann fourb : mi sort lir Raffarin, so léspès madré, i rakont partou li krétik pa Sarko, mé kan zéléksyon sar fini, nana késtyon pou pozé. Bann pli pir la-dan, sé lo bann moun,bann gran partizan Sarko, i fé pass ali ti-papyé pou li krétik bann partizan François Hollande, mé san bien vérifyé sak zot i ékri épi i mank pa, zot i gingn la démanti an dé tan, troi mouvman.

Arzout èk sa, tout in bann zistoir sèrvis ségré, lé fané partou. Ziska larzan défin Khadafi i rant dan la dans é pa arienk pou in katsou, pou sinkant milyon l’éro. Sa lété fine di sa l’otrozour dann la guèr kont La libye, mé sa i arsort zordi èk in lète pli vré k’si lété vré... Sa, pou dir azot lé shoz i marsh pa tro bien pou Sarko. I ariv ali tout sort shoz. Konm di lo kont, kan bèf i afayi bann tik i mont dsi li. Pou Sarko, i diré, lé kaziman konm karapat dsi tété bèf mèg !

Justin