Oté

Konm li di : « Li la pa lo pèr noël ! » : nou té fine romarké é pliské !

Justin / 30 octob 2017

JPEG - 43.6 ko

Mésyé lo prézidan Macron i sort fé in tour dann la Guyane. É konm li yèm bien larg kozman an foutan, li la pa mank di nout bann sèr épi nout bann frèr guyané : sirtou pran pa-li pou Pèr-Noèl. Li téi vé di par-la, i fo pa banna i kont dsi li pou gingn kado.

In kozman konmsa, mi asir azot, i fé travaye mon tète. Pou komansé : « pran pa li ! ». Kosa in n’afèr konmsa i vé dir, si pou donn in kado sé lo péi La Frans i fé lo kado, pa mésyé Macron Amoins ké li pans La Frans sé li, La Frans lé ali ! Ni konpran bien sa sé in n’afèr lé loinnn la vérité.

Dézyèm z’afèr i pass dann mon majinasyon : pou moin la Guyane konm La Rényon i tonm dsou in réjime néo-kolonyal, avèk l’ésploitasion lo péi épi lo pèp. Donk kisa i distribyé kado ? Sé bann guyané si mi tronp pa. Arzout ankor la baz pou lans fizé kisa – konm k’i diré - lé gagnan la-dan si la pa lo puisans néo-kolonyél donk La Frans èl mèm-pa mésyé Macron, bien antandi, pars li lé pa propriyétèr La Frans.

Astèr si mi tronp pa nana mine d’or la-ba dann La Guyane é bann gro sosyété i pèrd pa arien dann sète afèr. Ni pé parl osi bann nap pétrol é si mi tronp pa La Frans sar gagnan é nout bann frèr épi nout bann sèr La Guyane va gard dann trou… Nou nora lo tan anparl d’ot shoz, mé an atandan lo vré pèr noèl la pa La Frans, sé La Guyane k’in pé i vé, sansa i vé pa, é pou azouté in Pèrnoèl ésploité vèy pa Baba.

Nb si zot i vé antan in bon parol mésyé Macron ébin i fi zot i majine kan li la di : « La parol l’éta sar réspékté ! ». Pa tout suit pou toutsuit mé dann lo tan. Lo répé la parol doné sa lé sakré sa k’i di, alé oir mi pans li lé plito mantèr.