Pou komansé nana lo sans prop. Fey sonz sa lé plito vèrni é kan dlo i tonm dési, li la pa pou arète la, li koul atèr. Aprésa nana lo sans figiré : ou i di amoin dé kozman, é vénan d’où, sa i fé pa moin arien. Demoun i di, lé konm lo dsi fèy sonz.

Sé pou dir aou, ramas out kozman pou ou, pars moin pèrsonèl mi s’anfousa… Romark sa i dépan si lo moun lé siséptib, sansa si li lé pa. Si li lé siséptib, pou in oui, pou in non, li anbal. Si li lé pa siséptib, li fé konm lo dsi fèy sonz, sansa shant out kont, domin sé out fète.

Sa i vé dir in pé la mèm shoz.. é zot ! kosa zot i anpans ? Arien ditou ? Fé travay z’ot koko, fé bouy z’ot matyèr griz, moin lé sir zot va oir ké rant-rant, nou lé konm ki diré, dakor rantre nou.