Mésyé, Médam, la sosyété, koz èk moin sé koz èk in kouyon, mé sé o pyé d’lo mir k’i oi lo bon mason. Mé zami moin la kol dé léksprésyon inn avèk l’ot-dé patoi mi pans zot i koné pars bann léktèr Témoignages, sa i koné in ta d’zafèr. Zot la fini rogard la plui tonm dsi fèye sonz, ébin zot la fine oir koman li évakyé le lo an katriyèm vitèss par raport néna in vèrni dsi li-mi koné pa koman sa i apèl mé li lé drolman éfikas. Lo dézyèm kozman zot i doi oir lo tablo : in zorèye koshon dann in marmite poi sa lé pa banal é anplis li antan pi arien. Normal Afèr moin la kol lé dé ansanm ? Sinploman pou ranfors lo sans mon kozman. Si vé dir lo moun i fou pa mal sak i di ali é tanmyé plito ké alé fé sousi pou sa. Alé ! mi kite azot rofléshi la dsi é ni artrouv pli d’van. Sipétadyé !