Zoizo-la néna in vilin défo k’i sava dizon avèk son linstin d’konsèrvassion : li fé pa son ni li-mèm, li kouv pa son zèf d’apré sak mwin la konpri. Li sava dann ni lé z’ot, li dispèrs lo zèf sansa lo pti fini énète é li mète son zèf dann ni épi konmsa li assir son déssandanss. Konm la natir i komann ali pou fèr.
Lé bon kan sé in zoizo, mé kan sé in péi i prétan li réspèk lézot épi la loi internassyonal, é tout sak i fé d’li in péi néna bone répitassion, alé oir li ossi li lé san réspé konm d’ote… Lé vré an parmi bann grann puissanss néna bonpé i répèk pa bann péi pli pti, mwin for, dann linkapassité ansèrv la fors pou défann zot droi.
Mi pé site pou zot sak lamérik épi lo royaume uni la fé avèk bannzil Chagos san réspé pou lo droi la dékolonizassion, san réspé pou bann pèp téi rèss laba dopi plizyèr syèk mé mi vé pa anparl sa zordi.. Pétète domin.
Zordi mi vé anparl La franss in gran péi démokratik : li rant dann la COI(commission de l’océan indien)par La Rényon départman franssé épi li fé konmsi nout péi i konte pou arien ditou. I fo dir la solidarité dann la COI lé pa tro for é finalman mèm lézot i pran pa kont de nou. Konm i pran pa kont lo démantèlman bannzil Komor, épi lodékolonizassion inkonplète pou Madagascar.
Mé sa i anpèsh pa tout mète azot koté lo gran koukou é nou lé pa pli avanssé ksaé tintin pou la solidarité.
A bon antandèr salu !

Justin