Mardi, moin la vi madam Pausé, mèr ranplasan, dann télé. El la vni la konm in moun té i pas, sansa konm in l’invité k’la invit ali par li mèm ; kosa èl té i vien di ? El té i vien rakont, l’avé rant èl, Iznogood épi Antonio in l’akor an voi d’famiy, près bon pou akoushé, mé pankor bon konplètman. In l’akor dsi koué ? In l’akor pou dézyèm tour z’éléksyon avèk in sèl mo d’ord : « Tout, sof Gironcel ! ». Pou lo rèst, èl la di, i fo atann kan sar bien fine finalizé.

Soman, fransh vérité, èl la donn in l’argiman kaziman inbatab ! El la di, dopi Gironcel la kit lo konsèy, zot la touzour bien antann : èl mèm, Iznogood k’i vé èt mèr la plas lo mèr, épi Antonio. Sa in n’afèr la bat amoin atèr ! Pou koué ? Pars kan la fé la grèv sèrvis téknik, moin la pa antann dir lé troi shèf lété solidèr, moin l’avé mèm l’inprésyon Alamélou épi son bann dalon l’avé pas kalpyé la mèr par intérim, épi moin la pa antann dir Antonio l’avé done aèl in kou d’min. Myé k’sa, in pé avan, kan èl la désid arèt inn-dé pti kontra, son bann z’ami zordi la konm obliz a èl anval son vomi.

Dan in n’ot androi, pa dan la méri, moin la vi dé klan apré kaziman batay, sirman dispit, épi lans azot in bann adzéktif kalifikatif pa intérésan a gingn dann zansiv. Moin té pa tousèl l’androi-la ; mi pans mèm, si toulmoun l’avé té la, té i doi an avoir o moin katrovin pèrsone. Donk si bann moun, moin la vi, té i antan bien, kosa narté si zot té i antann mal ? Mi arèt la, pars pétèt moin sré riskab di dé shoz i fo pa.

In pti réfléksyon kant mèm : zot i koné poul de Frans ? Kan sa lé dann park tro pti, kan sa lé an mank vitamine, é bin, konm di lo kont, san égzazéré, sa i mord lo k. ; inn-a-l’ot ! Apar k’sa, i antan bien !

 Justin