Oté

« Konm shoushoute avk la mori »

In kozman pou la rout

Justin / 29 désanm 2017

JPEG - 43.6 ko

Sanm pou moin sa in signal l’antant. Sa lé vré an dalonaz. Sa lé vré rant marmaye l’ékol ! Sa lé vré galman dann ménaz. Mi koné in vyé kamarad la désid maryé son fiy avèk sak i aèl son kopin pars d’apré li zot lété dopi étan pti konm shoushoute avèk la mori. Kan ou té i oi inn, l’ot té pa loin é kant ou i oi l’ot inn lé pa a dé pa. La vi lé konmsa ! An touléka, lé myé k’lé konmsa plito k’i bataye konm lo shien avèk lo shate. L’antant, sa sé in n’afèr i égzis pa par dékré la proféktir. Mèm prézidan la répiblik i pé pa désid in n’afèr konmsa poitan li mèl ali toutsort dé shoz. Mé sète la li gingn pa si tèlman i paré sé pou sa la invant lo désoubnaz : koman kass in n’afèr kan li doi z’ète solid é li lé fine karyaté. La loi i di koman k’i fé sa ! A s’ki paré. Mé alon arvni dsi shoushoute avèk la mori : i paré sa i sava bien ansanm. Moin lé sir in pé la boush l’apré fé d’lo l’èr ki lé. Alé ! Mi lèss azot rofléshi la dsi é ni artrouv pli d’van sipétadyé.