Minm si na pwin vréman do kwa pou fé lo fanfaron èk sa, dopi dimansh néna i san pi a zot ditou. Konm si dopi dimansh soubik shakinn dantronou la ranpli toudinkou, konm si dopi dimansh nou la trouv in lanplwa pou tout, konm si dopi lontan ni rod, é la toudinkou nou la trouv anfin lo bann gran défansèr la Rényon, konm si ni koné pa kisa i lé la drwat, konm si, konm si… Voui bann la drwat i fé lo fanfaron èk trant konséyé, kinz madam blé èk kinz bononm blé pou la vièy drwat, vik la lwa té obliz aplik la parité. Kisa la pérmèt in pé fé la piont zordi ? La drwat ?

Mi koné pa si zot va nyabou anparé, minm si ni koné pa touzour pou kosa nou la voté dimansh é sirtou kosa lo nouvo lasanblé va nyabou fé ? Mi san konm si ni rant dan in zonn dé tirbilans èk bann plantèr ki poz touzour késtyon pou zot lavnir kann. Ala in bon sizé pou travay dosi dan lirzans, vik lagrikiltir sé la konpétans lo lasanblé. Dann dé mwa néna la koup, i poz késtyon, mé i atann touzour la répons. Ni lo prézidan ni lo promié minis na pwin inn i répond, poitan lo prézidan la promèt in moné. Na pwin inn i réponn ni lo shofèr lavyon ni lo manèv.

Sirtou fé pa konm in limoris si in radio la kour. Li poz in késtyon in konséyè madan nouvèlman éli, li di konmsa « Di a nou sé koué lo promié travay ou sar fé an arivan la ba lasanblé ». Lo madam in pé dan lanbara la pran in lèr pou réponn a li « A koz sé pou travay don, mi krwayè té pou bat karé, pou alé war mon zanfan an frans, pou gingn inn moné, tousala... » Souvan-dé fwa bann zimoris i koz pa toratravèr, souvan – dé-fwa zot na rézon. Mé la, konm si néna konséyé konm sa ?