Lo 25 zanvié lo pèp grèk la voté, boudikont zot la vot pou ki mèt in laré èk la politik lostérité banna té i aminn sirtou èk sak lorop té i obliz a zot fé. In ot gouvérman lé an plas é dopi sin mwa tout i mèt la min pou sèy trouv in solisyon pouk lo péi i pran in pé lèr é sirtou pou partaz-partaz in pé sak néna, pa pou partaz la mizèr konm i fé ziska zordi, plito pou in pé plis dé zistis dizon. In boug i tyinbo guidon, sanm pou mwin li tyinbo byin minm, la manièr li tyinbo i kontrayé lorop i prétan.

Lorop i vé kontinié konm avan. Pou li zéléksyon zanvié i kont pa, li kontinié èk lostérité minm, li vé tay ankor dan la rotrèt, bann fonksyonèr grèk i dwa ropas a la kèss, tanka drwa travay parl pi, i vé goumant la TVA si manzé é an minm tan i di i fo bèss in pé zinpo pou in pé pétèt minm i domann pou siprim tout. Sanm pou mwin, konm i prézant a nou tousala lé konm si i vé bat bann grèk déor, an déor lérop. Dopi dé zour shakinn i avans son solisyon pou bann grèk.

Néna moun in pé rokin i di konm sa si la grèss i gingn pi payé, fou déor, pèrd pi lo tan èk sa. Dot in pé pli séryé i domann éfass la dèt vik pou zot la grèss i nyabou zamé ranbours tout. Dikou lo promié miniss la grès la trouv lo solisyon, li mèt sa rant la min son pèp, li di pou rézon sé lo pèp ki désid, sé lo pèp lo souvrin. Ki pé di mié ? Ki pé fé mié ? A nou osi nou néna sizé pou mèt dan la min lo pèp. Konm si in pé la pèr antann la vwa di pèp !