Pou in loson sé in loson sak lo pèp grèk i vyinn donn a nou dopi dimansh. In loson démokrasy sirtou, lo promié minis grèk la konpri vit, vik dopi in bon koup do tan, lorop i zoué la boul èk li, vik dopi sink mwa, li lété dan in tramay politik èk lorop, li la nyabou sort par la grann port, li la rorganiz son référandom, bravo pou li. I di touzour kan lé dann in linpass polititik si ou lé in gran démokrat, fo touzour domann lo pèp son lavi, lo pèp lé souvrin, lo pèp i koz an dérnié. Si sak la éspasé dimansh an grèss i pouvé éklèr in pé désertin ?

Koué nou la pa vi é antandi diran tout la sominn avan zéléksyon dimansh ? In grin larzan lavé pi dan la bank, domoun té fé la ké pou tir dis, vin, trant éro. Mandoné la bank la koup tout. Manshandiz lavé pi si létalaz, magazin té vid. Médikaman té i mank dann la farmasi, konm si tout té fé pou di bann grèk, kiswa zot i vot “voui“ pou rovni konm avan, kiswa zot i vot “non“ é la va tonm an fayit, konm si tout té fé pou touf banna, ziska fé plèr gramoun si trotwar somin.

Konm koué ryin lé ékri davans minm si tout la été fé pou lav koko d’moun, minm si la fé lantouraz pou mié atak bann grèk, èk fiérté, èk kouraz zot la anvoy valdingé la madam mérkèl èk lo rèss. Byin sir sondaz té i donn lo oui dovan, tout sondaz dayèr té i donn lo oui dovan. Zot la vi kosa la éspasé. Pou sak i di na pi ryin pou fé, lé konm sa, lorop i désid tout, no zami grèk la mont a nou shomin, néna i di banna la mèt in pé loksyzinn dan lorop. Loksyzinn ou lèr pir ? Pourvik ni réspir mié dan so lorop ki tanzaot i étouf.