Moin la parti Salon la mézon. In ta d’moun té i sort avèk in balé mazik vèr épi blé. Moin la parti la foir Bra-Panon, bann troizièm az té i pil i fo oir, kisoi tango, kisoi tcha-tcha, kisoi ankor la polka, kisoi la vals, lo rok lan, étsétéra. Done paké marmay ! Tout i roul ron. La kriz ! Kèl kriz ? An plis solèy té i pèt an flèr, lo sièl té blé vèy pa. Moin lété kaziman dann paradi.

Dann télé, mi an apèrsoi Moiyin Orian lé riskab pran d’fé é pli vit ké ni pans. Si détroi d’Ormuz i boush, pétrol i pas pi. Konm nou lé si tèlman intélizan pou an avoir kas l’otonomi énèrjétik, dizon nout poi lé o fé. La glas la fonn dsi Pol nor é bann bato i sava pas par an-o épi pa par an-ba. Donk nou sar mèm pi dsi la voi lo gran komèrs an bato. Kèl konékans ? Pa in bon konsékans touléka.

Pars nout bann voizin i vé pi l’Erop la désid siprime l’èd sosial bann plantèr kann. Afors débat, Younous, dépité éropéin, la niabou gingn in promès sirsi avèk gouvèrnman fransé. Kèk zané, mé konbien ozis ? Sirtou ké l’èd i roprézant la moitié lo pri la kann bann plantèr i toush.

La kann, sé vinn-sis mil éktar. Arzout èk sa, ui mil éktar la tèr irigé la poin arien planté dsi... Sa i fé, si mi tronp pa, trann-kat mil éktar. An plis ké sa, nana in paké milié éktar abandoné. Nout rishès ? Sansa nout mizèr ? I pé èt inn konm l’ot, provik ni trouv in bon solision, ékilibré, an dégajan anou.

Mé si zot i vé, ni pé touzour shant : "Tou va tré bien madam la markiz !", si sa i pé kontant nout kèr...

Justin