Oté

Konm Tiloun i di : Arète fé la m… avèk nout manzé, siouplé !

Justin / 27 octob 2016

Na poin lontan madam Aude lété l’invité dann in télé pou anparl bann problèm konsomatèr : in grann késtyon, mi pans, sa i izar pa zamé si tèlman nan problèm dann sète afèr-la. Moin na poin arien pou rodir la dsi, pars lé bien itil demoun i koné z’ot droi. Mé la pa d’sa ké mi vé anparlé !

Mi vé anparl la kuizine. Lo zournalis-prézantatèr la poz madam Aude in késtyon dsi manzé La Rényon é èl la réponn : rovizité sa sé in n’afèr k’i plé pa moin. Pars lé vré, bann kuizinyé étranj i ariv La Rényon épi zot i rovizit. Nout rogaye sosis ? Rovizité. Nout kari poisson ? Rovizité. Nout grin ? Parèy ! Nout brède ? Parèy. Nout rogaye pistash ? Arvizité ! Nout rogaye tomat ? Arvizité san piman siouplé ankor arvizité. Mi pans apré zot va di, avan lo bann gran shèf la vni isi, l’avé poin arien. Arien ditou ! Rozman bann moun étranj l’arivé.

Moun étranj ? Kroi pa sa. Pars zournal midi, mardi dsi Rényon promyèr l’avé troi pèrsone pou anparl la kuizine : in zournalis i apèl Paskal nonbril antéré isi, in madam i apèl Izabèl nonbril antéré shé nou épi in shèf La Rényon avèk in bon nom rényoné. Zot la nyabou tourn nout kuizine dovan-déyèr. Obliyé lo ri-kari-lo grin-brède. Rovizité tousala ! Dégizé tousala ! Tourné-viré tousala ! Donk la pa bézoin moun déor, moun étranj pou fé l’opérasyon, fé la shirirji d’boté avèk nout kuizine. La trayïzon nou osi ni gingn fé é somanké sa i pass myé ké par bann gouyav de Frans.

Na poin lontan moin la lir lo kou d’gèl Tiloun dsi so fas-bouk dsi lo manzé zistoman. Lo ga téi di : arète fé la m… avèk nout manzé siouplé ! Mi pans li na pliské rézon