Oté

Konmsa ni konpran la vi !

Justin / 3 novanm 2017

JPEG - 43.6 ko

In pti rotour an aryèr i pé pa fèr anou d’tor. L’avé in foi in prézidan Sarkozy é prézidan-la la désid déklansh in zeta zénéro pou bann péi l’outromèr : son manda prézidan la dir sink z’ané é li la komans an parl sèryèzman dsi dévlopman bann péi l’outromèr o bout katran. Si tèlman ké son manda té fini épi son program té pankor komans rant an aplikasyon.

Apré li l’avé lo Hollande é lo ga la mète tout in manda pou diskite dsi l’égalité reel. Si tèlman ké li la ronons prézant ali pou in n’ot manda é bann péi l’outromèr lété pa bien avansé dsi la finisyon lo manda. Ala ké mésyé Macron la gingn zéléksion é ké li la désid pa pèrd son tan mé sanm pou moin in an va pasé é pandan éstan-la kabri va kontinyé manz salad.

Lé vré tazantan li lans inn dé pist é ni pé kroir bann pist-la i pé z’ète in bon n’afèr po nou. Kansa, kan li di i fo éstop l’amannman virapoullé pars sa i anpèsh bann rényoné dévlop z’ot l’énèrzi. Kan li di ankor i fo rann bann z’institisyon pli sinp : in sèl l’asanblé, avèk tout bann pouvoir konsèy départmantal épi konsèye réjyonal... Na dé foi, li poz bon kalité késtyon. Lo répons lé marké an pointiy, mé sak ni vé sé ké lo bann répons lé marké an klèr dann lo tèks.

Pou fini avèk sète afèr-la mi rapèl kosa parti kominis i pans é sak li pans konm diré l’ot lé klèr konm l’o d’sours : in solisyon par bann rényoné, dann l’intéré bann rényoné, pou gingn alé dann sans l’intéré bann rényoné . konm sa ni konpran la vi.