Oté

Konparézon la pa rézon, mé alon méfyé kant mèm. Sha shofé la pèr lo fré !

Justin / 8 mars 2021

JPEG - 43.6 ko

Mézami mwin la lir dann Témoignages la somenn passé in lartik dsi in nouvo lizine pou fabrik shanpignon épi zandiv. Pou kossa i sava fé sa issi La Rényon ? Souvan dé foi, si i fé sa, sé pars néna konsomatèr pou lo produi épi konm la prodiksyon intèryèr lé pa sifizan : donk i di néna in gite pou la prodiksyon.

Mi doi dir azot mon papiye i palpite pa tèlman ni pou l’shanpignon, ni pou l’zandive mé i fo kroir toulmoun la pa konm mwin : konm i di souvan dé foi, toute bann gou lé dan la natir. An touléka, d’apré sak mwin la tandi dir, kan la fé lizine-la lo lantropronèr - in rényoné-la pa gingn in l’ède piblik. Pou koué ? Pars pou band pouvoir piblik l’avé poin d’marshé pou bann produi-la.

Lété si tèlman vré ké plizyèr z’ané apré lo lizine la produi kate tone par somenn, shanpignon, épi z’andive. Pouvoirpiblik la tronpé é lantropronèr l’avé rézon. Mé oila, konm i di, néna d’ote la gingn l’anvi - lokazyon i fé lo laron - é an parmi in l’antropriz la Pologne é pou fé lo mèm zafèr, èl la gingn in l’ède éropéène é san tardé nora in dézyèm lizine pou doub la prodiksyon lokal.

Doublé dann kèl sans ? Miltipliye par dë, sansa koupé, é pass dovan. Etan pti mwin la zoué lou koupé émi rapèl ankor kopssa sa téi vé dir ! La suite va aporte anou kissoi la démanti, kissoi la konfirmasyon. An touléka lo lantroprénèr la gingn kék milyon l’ède l’érop é sé dann la Pologne v‘ashté kaziman san pour san l’instalasyon. Nou va oir la suite, mé alon méfyé kant mèm !

Pou koué ? Pars lé pa di lo dé l’izine i sava gingn dévlop an mèm tan. Lé pa di k’inn é l’ote i pran pa l’fon. Pétète nora lésportasyon mé i fo dir noré pi fé kékshoz d’otr, noré pi dévlop in prodiksyon rényonèz avèk l’ède-la. Anfin ki vivra véra é si konparézon la pa rézon, alon méfyé kant mèm in pti grin. Sha shofé la pèr lo fré.zot o kroi pa ?