Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
Mi sort pans azot in pé zordi. Pou kosa d’apré vou ? Pars parti sosyalis i vé roganiz in sort zétazénéro par li mèm, pou mète o poin in program pou dévlop La Rényon. Arienk sa Baya ! L’èr-la, mi di dann mon kèr : « Sépa si bann rouj-de-fon va oir sa d’in bon zèy, ou d’in mové zèy ? Pars sa inn bann i manj pa in grinn sèl ansanm. Zot lé soidizan moun de gosh mé i fo pa d’mann azot pass vakans ansanm ! ».. Pars étone pa si i trouv in pé an mové zéta. Ou i konpran sak mi vé dir ? Konm di lo kont i pé zète osi dann in mové zéta politik.. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
Mi sézi bien sak ou i di. Vi parl d’in l’inyon inposib solon ou ? Pars pou kosa fé in program si, konm Bismarck té i di, par rapor bann trété, sa sé konm « shifonn papyé ». Toulmoun i koné sa la amenn la guèr é pa in n’ot zafèr !… Donk, la i soulèv in késtyon inportan : soi sé in program pou apliké, soi sé in program pou sèrv gob-moush bann zéléktèr épi anvoy dingué kan la fine gingn bann sifraj. Si nou lé dann dézyèm ka, konpran bien sa lé pa sèryé ditou, é lé pa itil pèrd son tan dsi in n’afèr konmsa. Arzout èk sa parti sosyalis la zamé fé pou vréman in bon program pou La Rényon. Konm di lo kont, dabitid li oi pa pli loin k’son boutné. Alor dann sé kondisyon lé difisil fé in bon zakor avèk li, in zakor k’i sava dann lo fon dé shoz.
Malgré tousala, nou lé pou l’inyon. L’inyon pou kosa ? L’inyon pou tir lo péi dann malizé. Si posib in l’inyon bien larz, rant tout bann mouvman, rant tout demoun, i vé pou vréman lo dévlopman pou nout péi, lo dvlopman pou La Rényon ! lo rès – konm in vyé profésèr matématik téi di – sa lé konplètman ékilatéral pou nou.