Lo tan souvan dé foi lé shanjan. Talèr solèye i poik. Talèr, la plui i grinn. Alèrt gro plui ! Alèrt gro mèr ! Ménas siklonik, kalm pla dsi lo péi. Mé, lo tan sé lo tan alé oir lo zimèr d’moun sé in n’ot afèr. Lé vré désèrtin moun néna, konm i di l’égalité d’zimèr, mé néna désèrtin dé foi zot lé zantiy konm in pla lantiy, défoi zot lé an lanp tanpète. Pli pir, zot lé inprévizib é sa sé in n’afèr lé dir pou ankésé, lé dir pou siporté. Solman si in moun lé konmsa é si lé z’ot moun i fé savoir ali, akoz li arivré pa a sirmont son z’ékar d’imèr ? Sof si sé in vré maladi é dann ka-la la médsine néna sousi pou fé. Alé ! Mi kite azot kalkil la dsi é ni artrouv pli d’van. Sipétadyé !