Kossa i lé in konplotiste ? I pare sé in moune sansa in linstitissyon i akize bande zofisyèl, dann déssèrtènn shoz zot i fé d’alé dann sanss kontrère d’sak zot I di épi provoke band katastrof zot I vé anpèshé. Néna dé foi, wi pé domande aou avèk rézon si bande zofisyèl I fé pa dé shoze konmsa issi dann nout péi.

Mé mwin la di mwin lé pa konplotiste pou in sou.

Solman kan mi panss la deng, mi pé pa anpèsh amwin fé travaye mon tète, kalkilé, donk ganbèrjé. Mi domand an mwin-mèm, par égzanpe si té i pé pa évité ké la deng i kontinyé son shomin konm li kon tinyé dopi dé troizan. Mi dmand si té pa possib kal ali dopi l’ané dèrnyère sansa l’ané d’avan. Mi rapèl l’ané dèrnyère la di dann télé, la di dann radyo, épi la marke dann zoiinal téi sava larg in sharjman moustik male trété tèl fasson ké bande fémèl i ponde bann zèf stéril. .Sa la pa sorsyé fé in n’afèr konmsa, mé la fé sa l’ané passé, é ni koné la deng la pouss an avan ankor. Mi di dann mwin-mèm si bande sèrviss l’éta l’avé vouli donn in kou d’kolyé ladan ébin nou téi anparl pi la deng. Donk si la pa fé lo nésséssèr pou vréman sé ké l’avé poin vréman l’anvi. Pètète i vé ni viv avèk alé oir nou rényoné ni profère viv san.

Mwin lé pa konploytiste pou in sou mé souvan dé foi mi poze amwin késtyon.

Mi poze amwin késtyon dsi la kovid épi son bande zavatar. Mi sèye trouv la rézon pou koué la lèss san mil pèrsone voiyazé moi d’zanvyé, moi d’févriyé, san kontrol sèryé. Mi domande amwin pou kossa lété dir pou trouv bande mask, pou fé band tèst, pou mète an plass léstratzi lo motif « impèryé ». Zot la dmande azot pou kossa néna prèss sinkante mil pèrsone l’avé in motif sèryé vnir La Rényon, sansa alé dann in sanss épi dan l’ote. Sé konm k’i diré in rush avèk in mouvman d’zabèye i bourdone san sèss, i bitine a tou kassé épi i vé d’fors rantré épi sorte La Rényon. In foi anpliss ni vé vive san la kovide é l’éta i vé ni fé avèk. Arzoute èk sa li néna toute in shapite zintèrdi épi pa d’zonm de loi pou fé apliké.

Mé antansyon lété i ariv an érope é band zéropéin la bézoin alé an vankanss. Band mémé, bande pépé, i vé vni avèye zot ti zanfan issi shé nou donk si talère, lo zour pou landmin i rouv nout l’aéropor an gran, si toudinkou band shif i vien pli bon pou arkomanss apré, mwin va panss bande virus-la, épi bande zavatar lé même konpliss avèk la politk lo gouvèrnman lokal. Mwin lé pa konplotiste pou i n sou, mé défoi mi poz amwin késtyon. Mi domand amwin pou kossa i di A é aprésa i fé B. Mète zot zorèye in pé pli prém’a dir azot in n’afèr : Bande mové lang –donk bande konplotiste- i invante ziska gouvernman lokal i fé toute sak li pé pou kass-kass in pé noute pèp, afébli ali épi afébli son kapassité pou rézisté. Mé sa sé band pur konplotiste : la pa mwin zot la bien konpri mi manze pi ri shofé la.