Lontan, in frigo té i dur, té i dur, 10 zan,15zan ; minm in kuizinièr, té i di gazinièr, sa la tol té kosto, té épé, té lour…
Minm loto la karosri sa lété solid ; parsok kromé, tout an métal ; sa i kas pa o moindre shok !

Zordi i vann a ou kalité marsandiz, sa lé fé po pa duré ; li lé fé po fonksyone inn ti bout tan ; li lé mor, li la fini kasé dèk la giny inn ti kou ; é tout zafèr parey !
Rogard in kou ; zot i vann a ou koméla téléfone portab ; oui koné sa i sar partou, dan la pos, dann somin, dann bitasyon ; dakor, i di pa ou alé plonz dan la mèr avék, lo sèl va rantr partou va piké, va rouyé !
Lo pli grav, zot i vann a ou sa san protèksyon ; na tèlmann modèl ; ou nana lo P1, lo P2, lo P3, lo P4 ; la ogard si lo dévantir lekspozisyon vant, i amontr a ou tout, na poin rien po kashé.

Foutor, sa la pa mon problèm ; si ti vann a moin in aparey i kout 500 éro, ou la pa kapab fé nni in ti posèt 5 éro po moin mèt a li dédan, konm sa si li tonm, di notèr 2 mèt dizon, li va pa kasé !
Ti arsant amoin si lo téléfone lé ankor sou garanti ?
Pokoué ?

Servis aprè vant va di a moin sé ma fot, sé de ma responsabilité, a moin minm la fé tonbé, a moin la fé sa, la garanti i mars pa, é patati é patata.
Ti asèt in loto, parey, lo tan out krédi la fini péyé, dizon lo loto lé bon po anvoy la voiri ; tout lé fé po toué arsèt in not, tout la vi ti sar fé sa ?
Konsomé, konsomé, arèt èk sa, zot va ruin a nou !
Zot va ruin a zot ! ma arèt asté !

 Justin