Yèr matin mwin lété apré rogarde in kou dsi l’internet in pé toute vidéo dsi l’imprimante 3D é sa la étone amwin oir koman sistèm-la l’apré difiz dann toute séktèr si tèlman lé riskab modifyé san pour san déssèrtènn prodiksyon épi dé ssèrtin métyé.

Bien sir kan sa la komnssé néna kék zané lété arienk pou fa brik bann ti zobzé : tèl architèkt téi fé in pti kaz dann la 3D pou rann ali konte sak lo batiman sar dann la réalité. Myé k’sa, li pé si li vé modifyé son plan pou in méyèr produi solon li épi solon son kliyan. Bann dantist ossi la ansèrv sa pou fabrik in kourone pou lo dan san pass par in proféssyonèl lé Madagaskar sansa ayèr.. Biensir nou téi rèss dann lo pti é pankor dann la réalité.

Mé oila, momandoné la komanss fé bann gran-gran linprimnte 3D pou fé bann gran konstriksyon. Sé konmsa ké mwin la vi in vidéo dsi la fabrikasyon in mézon an 24 èr-in pé pliss dann la réalité, mé bokou moinss in batiman tradisyonèl é anpliss avèk bann matèryo diféran : sa sé lankr lo linprimante… Laba dann la Hollande néna in lékip l’apré fé in gran mézon tradisyonèl bordaz kanal, dann la Chine néna in ga apré lanss in lotisman 15 mézon, é mèm bann zimèb. Bann zassosyasio n zot ossi i pran par toussa é l’apré mète o poin in téknik pou roloz bann viktime trabbléman d’tèr, sansa pou siprime bann bidonvil.

Toulmoun i oi fassilman in sistème konmsa néna son bon épi son mové koté pou son avantaz néna la vitèsse épi lo pri, konm défo néna lékonomi dsi la min d’èv. Arzoute èk sa si dann tousala sé la loi lo profi k’i komand e zot i rann azot konte par zot mèm la pa sak travayèr i souète. Mé, ni vé ni vé pa, sistème – la i sava dévlopé é sirman ranplass ofiramézir lo konstriksyon tradisyonèl.

Ni pé fé travaye nout tète dsi l’arivé in sistème konmsa, mèm shé nou, é koman fé in sistème éfikass-nou la bézoin la kaz-rapide-in kaz an 24 èr - pa tro shèr é si anpliss i mète o pwin in sharte la kalité épi la moralité, i pouré ète in solission.

NB - Mé antansion ; mwin la pa lir nil par lété possib fé la NRL avèk sa é ranplass galé na poin.