Prézidan la Frans la di konmsa li va moraliz Kapitalism. Ala in bon program : mète in pé la moral dann z’afèr larzan... pars souvan dé foi, inn i jir avèk l’ot, konm di lo patoi lo zié kan lé kayloush : Inn i vol maniok, lot i avèy gardien pou oir si i vien pa.
D’apré zot, koman in pé la gingn gro larzan, Kapital avèk in gran K ? Défoi lé pa zoli-zoli ! Kan ou i pans in bonpé famiy la Frans la ramas larzan déssi komèrs zésklav, kan ou i pans ankor dan la guèr in pé la kapar le bien bann juif lèr lo propriétèr, bann nazi té i bril sa dann four krématoir, sansa té i fé mor sa afors trimé san manzé dann kann konsantrasion. Parl pi bann gran bandi kann i blanshi larzan la drog, étsétéra-étsétéra-la ké lo ra !
Biensir, tout la pa konmsa, mé dann in bonpé d’ka, konm di lo kont, larzan sé la transpirasion, parfoi le san bann travayèr, zot fors travay dann lésploitasion l’om-par-l’om.
Zot va di amoin sa z’afèr dann tan lontan, sa dann tan la marine a voil, sansa lo tan Zézikri té i marsh kat pat ! A bon, laktialité i rogard pa don ? Zot la pa vi kosa i sort arivé dann l’Amérik, épi dann d’ot péi ankor, zot la pa antandi anparlé le boug la roul demoun dan la farine pou kèk sinkant miliar dolar, zot la pa antann anparl bann patron i mète z’ot lantropriz an dégréné épi i ramas larzan konm dann batiman i manié la sab èk siman ?
Zot la pa antann anparl bann lalkolèr, sak i fé sipèr bénéfis déssi lalkol ? I prétan dir, in boutèy wiski i rovien dé éro sinkant, “fète é fourni”, épi i arvann dis éro : kat foi pli shèr k’la ashté. Alor, la moral, dann lékonomi, sa i fo, biensir, mé la moral dann Kapitalism, kont déssi, fié pa tro !

Justin