Mi pans, konm moin, zot la romarké, kan nana in manifèstasyon, bann moun la roganizé épi bann polis i di pa mèm shif. Sirtou si sé in manifèstasyon bann travayèr.
Si bann sindika i di nana dis mil pèrsone, bann polis i di nana dé mil sink san. Épi bann zournalis la télé, alé konprann pou kosa, i di k’i fo prann in shif rant lé dé... Kékshoz konm in moiyènn aritmétik !

Konbyin lavé dmoun, lo diznèf mars, dann défilé : la polis i donn in shif, sindika i donn lo doub. Touléka, minis lintéryèr sar kontan avèk son bann kontèr-la-mok ! Pou mon par, pou fé arète lo dézakor, mi propoz in solisyon brovété SGDG* : i fo kont lo nonm la pat, épi diviz par dé.
Si i trouv in nonm pèr, lé bon pou sa-mèm !
Si i trouv in nonm inpèr, i fo arkomans konté, pars nana konm in problèm ! Sa lé sir !

Justin

*SGDG = san garanti lo gouvèrnman… ! Garanti ? Sé konm in grigri ou sinonsa in sigidi !