Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, moin lé a d’mandé si ou i pans pa ké La Frans lé kapab abandone anou. Pou kosa mi di sa ? Pars mi lir aou bien é mi romark dann tout z’afèr ou i akiz l’éta. L’éta la fé si, la fé sa… la pa fé si, la pa fé sa, i pran pa l’èr avèk nou, i oi pa danzé nou lé d’dan. Arète in pé avèk so vilin manyèr. La Frans sé nout mèr patri é in mèr patri i abandone pa son zanfan : an kontrèr i rouv bien lo zyé pou rogard ali, pou avèy dsi li. Dir lo kontrèr sé mantir é mantèr i vien volèr é volèr i prospèr pa. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, soi ou i konpran pa soi ou i fé sanblan ou i konpran pa. Pou kosa mi di sa ? Pars la pa arienk in foi lo gouvèrnman nout mèr patri la bate nout intéré dann kanal pou aranj ali avèk d’ot ké nou. La pa bézoin alé tro loin pou oir sa : agard solman l’intéré bann plantèr kann. Holland la vni isi la pass la pomade dann nout do épi la gingn somèy olèrk bien défann nout z’intéré. I Agard nout l’anvironeman ! Solon ou Gouvèrnman La Frans lé pa konplis lo mové trètman l’apré fé ali. Ogard ankor la COI : Sé La frans k’i prézikonm prézidan é mi oi pa la COI pran bon désizyon pou nou.

Mi pans lé rogrétan oir lo gouvèrnman apré diriz lo péi konmsa an obliyan nout l’intéré konm lo vré l’intéré La Frans dann l’oséan indien. Na dé foi, moin na konm l’inprésyon lo gouvèrnman lé-konm i di « boushé a l’èmri », mé la pa vré. Lo gouvèrnman i mète ali o sèrvis bann monopol kapitalis. Banna nana in tak-tik dé lobby é sa i marsh vèy pa. Final de kont na arienk nou k’i rotrouv pa nou dann sète afèr-la. Kont nou, dann nout do, san domann nout avi, i amenn in politik néo-kolonyal é pandann tan-la, kabri i manz salad. Tok ! Pran sa pou ou !