La prèv sa sé in sorte poul lo zèf an or !

Domaz la pa fors pliské sa pou fé in trètman kont maladi-la. I paré néna inn lé apré éséyé mé inn kont sépa konbien vaksin sé konmsi sa sé in n’afèr k’i intérèss pa bonpé laboratoir.

Pou kossa mi di sa ?

Pou plizyèr rézon. Dabor inn, i fo ni romark La franss la pankor fé la syène – ziska zordi lé apré fé paré-t-il. Dézyèm rézon : mi panss si l’avé forss dossi la roshèrch in trètman, avèk tout larzan la mète, nora trouvé sa lé sir. In troizyèm rézon é mwin la fine di, la pa la solidarité i étouf bann péi rish-la é bann péi pov lé kant mèm in pé léssé par koté par raport bann péi rish. Diréktèr l’OMS la fine di plizyèr foi.

Astèr kan mi romont in pé lo tan,…

Mi rapèl pa bann laboratoir épi bann zéta la forss pou trouv vaccin kont la fyèv Ebola. La trouv inn mé i paré la pa tro bien marshé. An touléka konm maladi-la téi atak solman l’Afrik lé fassil konprand in fèb mobilizassio-sof band péi konm Cuba la anvoye in bonpé médsinn épi in bonpé médikaman pou zigile la maladi é li la réissi. Sof la Chine la distribyé son vakssin gratuite dan in bon pé péi.

Astèr alon parl de nou : la ding i tap for issi, mé na poin médikaman, la poin non pli vaksin. Zot i rapèl chikungunia, sa la anbète anou in bonpé, mé l’Amérik l’avé fine réissi son vaksin la pa anpèsh ali lèss anou épi d’ot anpoizone par sa. Alor sa i fé dir amwin kapitalis néna vilin manyèr, mwin la touzour di é la pa zordi mon l’opignon va shanjé… Mé sa i konfirm amwin dan l’idé ké shakinn, pti konm gran, i doi fé son l’éfor pars sak la di sa, la bien di :

I fo pa kont dsi bato tonton pou travèrs la rivyèr.