Mézami, mi sort aprann yèr soir La Suisse ossi néna déza son vaksin kont lo kovid 19. Oui, la Suisse in pti péi la fabrik li ossi la syène : konm de koi kan i di néna in kours pou vaksin sa lé vré pou vréman. In pé toutt péi néna lo téknolozi k’i fo la lans azot dann so fabrikasyon-la… La prèv sa sé in zanr poul zèf an or. Domaz la pa fors pliské sa pou fé in trètman kont maladi-la. I paré néna inn lé apré éséyé mé inn kont sépa konbien vaksin.

Pou kossa mi di sa ? Pou plizyèr rézon. Dabor inn i fo ni romark La franss la pankor fé la syène - ziska zordi lé an kour paré-t-il. Dézyèm rézon : mi pans si l’avé fors déssi la roshèrch in trètman, avèk tout larzan la mète, nora trouvé sa lé sir. In troizyèm rézon é mwin la fine di, la pa la solidarité i étouf bann péi rish-la é bann péi pov lé kant mèm in pé léssé par koté par raport bann péi rish.

Astèr kan mi romont in pé lo tan,…
Mi rapèl pa bann laboratoir épi bann zéta la forsé pou trouv vaccin kont la fyèv Ebola. La trouv inn mé i paré la pa tro bien marshé. An touléka konm maladi-la téi atak solman l’afrik ébin mi konpran in pé la fé sanblan sokour bann zafrikin, sanblan solman - La pa lo ka d’in péi konm Cuba pars péi-la lété vréman solidèr mèm si la pa in péi rish é an pliss l’amérik i pass son tan pou blok azot.

Astèr alon parl de nou : la ding i tap for issi, mé na poin médikaman, la poin non pli vaksin. Zot i rapèl chikungunia, sa la anbète anou in bonpé, mé l’Amérik l’avé fine réissi son vaksin la pa anpèsh ali lèss anou épi d’ot anpoizoné par sa.

La prèv k’i fo pa kont dsi baton tonton pou travèrs la rivyèr.