Mi koné pa si zot i rapèl tan-la ! Mi koné mèm pa si zot la koni tan-la ! Lo tan la frod dann z’éléksyon. Dann tan-la, pou gingn in z’éléksyon, té i falé bann go vaza té i shoizi aou, é la préféktir té i done son akor. Aprésa, avèk ranfor nèrvis, avèk la loi, avèk lo ronm osi, l’afèr té fèt : sak té i gingn lété sak i apartien lo bon parti. Tan-la, parti kominis, mèm li lété for, mèm li l’avé in bonpé z’éléktèr, l’avé poinn moun té i gingn in z’éléksyon. L’avé pi in sèl mèr té i apartien parti kominis. L’avé pi non pli in sèl konséyé zénéral, l’avé pi in dépité, l’avé pi in sénatèr.

Dann tan-la, sèl z’afèr ou i pé gagné, kan ou lé kominis : lo kou, la prizon, out bien mèm ou té i pé pèrd ; Sa lé bien vré ! Fé koz lo moun, zot va oir ! Défoi, l’avé plis votan ké d’moun inskri dsi la list z’éléktèr. Souvan l’irn té plin gran matin avan i rouv la port biro ; Kan i dépouy, bann z’asésèr kominis la fine ariv déor.

Biensir, lo parti té i viv kant mèm. Li té i fé avans son program, li té manifèst, épi son zournal té i parèt, zournal “Témoignages”. Koman-koman li té i fé avans son z’idé, li té i fé konèt nout l’istoir, li la mèt nout maloya anlèr. Sa la dir in bonpé z’ané. Apré, la frod la disparèt, mèm si la koripsyon lé ankor la. Koméla, mèm si ou lé kominis, ou i pé gingn z’éléksyon. La prèv, koméla, nana dépité, sénatèr, lo mèr, konséyé zénéral na zot kart parti kominis. Donk, lo risk ou i pé an avoir, kan ou i prézant aou z’éléksyon, sé gingn lo z’éléksyon. Pa toultan, mé kékfoi !
L’èr-la, ou i pans ou sé lo méyèr vi k’demoun la vot pou ou. Ou i di : moin lé pa propriyétèr mon manda, mé na dé foi ou i fé konmsi ! Ou i di : mon syèj, mon sirkonskripsyon, mon komine... Oté ga ! i koz pa konmsa ! Sé lo pèp k’i anprèt aou sa pou in pé d’tan, é si lé pa out parti, pou gingn sa, kont pa dsi, fyé pa tro !

Justin