Oté

« Kont pa dsi lo zyé lé zot pou dormi »

Justin / 17 avril 2018

JPEG - 43.6 ko

Sa in kozman bann zantiyé é mi pans néna in in gran vérité ladan. Sa i fé pans amoin in moun l’apré fé dor son pti baba épi li di lo baba : « Ou na ka fèrm lo zyé ! » é pou bien amontr sak i fo fèr, lo boug i fèrm son prop zyé, for mèm. Mé lo baba i brènn mèm pa son zyé, mèm pa bann ti poil i apèl bann sil. Kosa sa i amontr d’apré zot ? Promyé z’afèr si in marmaye na poin somèy, ou i pé sèye fé dor ali mé ou lé zamé asiré gingn in bon rézilta vitman vitman-biensir in rézilta i konvien aou, pa ali ! Dézyèm zafèr ou i pé di galman in vérité sinp : kont dsi ou an promyé, kont pa dsi lé zot. I pé dir ankor : kont pa dsi baton tonton pou travèrs la rivyèr é biensir sète-la sé in kozman rényoné. Alé ! Mi kite azot rofléshi la-dsi é ni artrouv li d’van. Sipétadyé !
Bréné : Sa té in vèrb nou téi ansèrv dann zé d’zasyète kasé. Kasé i kont mé bréné i kont pa. Bréné sé kan lo zasyète ou i pous i pas koté l’ot san kasé vréman mé i bouz a pène l’ot bout z’asyète an pasan.