Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo vré mason. Mé zami, zistoir-la, sa in drol zistoir. Mi souven kan moin lété lisé, l’avé in profésèr, in vré diktatèr, téi fé amenn anou la vi dir. Touzis si nou téi fé pa dann nout kilote kan bononm-la té i kontrol nout travaye. Pou nou li té for vèye pa koman, otoritèr parl pi é arivé la kaz, nou téi rakont koman nou téi moul poiv dan la klass. Ziska k’in zour in gran frèr i rakont koman la fanm lo boug i angirland ali dovan lo moun, é koman li rèss konm martin ki kouzi. Moin la di inn, inn la di l’ot, l’ot la di lé zot é kan lo boug la sèye fé pèr anou, mé zami, lé pa a dir, mé nou la montr ali kèl koté brinjèl i sharj. Kan li téi ménas anou, tout marmaye téi fé ou ! ou ! ou ! Si tèlman li la rèss san kozé. Aprésa li la parti médsin épi la pi romète ali dan nout klass. Moralité : si ou i vé fé l’for, fé ! Mé si l’moun i koné out poin fèb, prépar aou pou tranm dovan graton.