Mézami, étan pti kan mwin téi sava ankor lékol mwin la antann parlé d’in kozman in drijan. Sa téi éspass dann la guèr katorz-dizuite é in gran politisien téi di : « La guèrr sé in n’afèr tro sèryé pou konfyé sa pou bande militèr. ». Mwin la trou sa si tèlman zoli mwin téi di mwin-mèm lékol sé in n’afèr tro sèryé pou konfyé sa lédikassyon nasyonal.

I fo bien plézante in pé dan la vi, mé dizon sé in domi-plézanteri avèk sinkante pour san lo vré é sinkante pour san lo fo. Mé par l’fète, é si ni parlé in pé dsi l’Ars… Konm zot i koné sa sré in létamajor la santé dsi in téritoire.mé oila kan lo jénéral la pa bon, é kan son lantouraj lé mové mi panss i fo évite mète noute santé dann zot min. Tro sèryé nout santé pou konfyé sa l’Ars.

Pou kossa mi di sa ? Lo 11 mars 2020 l’avé poin la covid shé nou, é poitan la karsère anou pou konbate la covid.. Pli pir issi l’avé déza la dingue é bande zotorité d’santé la pa désside atak ali avèk fors… Pou kossa sa ? Pars in pé la zoué lintégrassyon dopi la tète ziska la ké, pars an bon métro zot téi panss lété covide té i falé ataké, pa la dingue. Dayère gouvèrnman la bien di in n’afèr konmsa !

I paré bande virus-la, sa sé in bande bébète fourné sa, épi madré vèye pa koman. I paré opliss wi lèss azot viv, opliss zot i shanj é ka n wi rode ali sou i form li la fine ariv sou in n’ote form. I paré mèm oute zantikor kan ou la fine gingn la maladi, i rokoné pa li kan li atak in dézyèm foi sou in form diféran. Ala ké zot i mète a muté é an mutan zot i atake tou zazimith ziska k’i gingn pi donn azot lo grin. Fitintan in minist lé dom téi di : « La dingue in sinp gripe ! ». Kréol I rakonte kan la maladi la foute ali atèr li la konpri kouéksé lo sinp gripe.

NB-zot i panss pa si la ding l’avé trape bande zamérikin, sansa bande zéropéin néna lontan lété fine prépar in vaksin pou li, sansa pass ali in bouyon d’onzèr. Mé oila, lo salté d’maladi i trape arienk bande tropiko, ala pou kossa in pé i di, i rode vaksin san rodé tou an rodan, é pou lo trètman lé parèye. La pa d’sito nou va oir in bo n bouyon d’onzèr pou règ lo konte virus.