Mi koné pa koman sa i éspass laba dann légzagone mé issi La Rényon konm in pé partou dann péi l’outre-mèr sa i spass pa konm linvantèr kontra la di si tèlman néna bonpé dmoune i fini zot karyèr konm kontra édé. I fo dir lo moune la invante sa li néna pliss sèrvèl ké nou, li néna ossi pliss konpétanss, mé oila li konpran pa lo pèp é inpossib ali trouv in solission pou bann travayèr éloigné par rapor lanploi.

Atanssion, diplomé sa i vé pa dir intélizan, sa i vé pa dir zot konpronir la sossyété lé bien aprofondi. Alor zot i gingn invante kékshoz ké zot i batiz kontra édé, sansa kontra PEC, mé sa i adapt pa avèk bann moune lé lwin par rapor lanploi… Si zot i vé m’a dir azot kékshoz : diplome sé diplôme, légzamin sé légzamin, mé la konprenir sé in n’ot afèr.

Astèr wala in n’ot afèr, mwin la antann lo nouvo mèr Tampon apré dir la moityé lo pèrsonèl kominal la komine li lé mèr néna lé an kontra PEC donk san kashyète anou déyèr nout doi banna lé an éshèk é non dann l’inssèrssion… Romark li la di ossi li lé pa pou la défanss lo sistèm PEC mé pou la défanss lo sèrviss piblik.

Fransh vérité lé ga rèss an pti kontra lé pa in idéal sa. Donk i fo sorte ladan pou rante plin pyé dann lo mond travaye. Pou kossa kan nout parti la di : alon rassanblé, alon propoz in plan pou l’dévlopman, alon mète nout péi dann shomin lo dévlopman, li la rèss toussèl è lo sistèm PEC é lé zot pouritir la kontinyé parèye. Bann Pec konm d’ote sé bann dané d’la tèr é mi oi pa kossa néna d’progréssist ladan.

Alor i vé manifèss pou la défanss bann sèrviss piblik. Ok ! sa i fo fèr. Mé done in statu bann travayèr lo séktèr piblik sa ossi i fo fèr. ? Inn é l’ot mé la pa inn san l’ote.. In progréssist i doi koz konmsa é pa konm i koz koméla.

A bon antandèr salu !

Justin