Matant Zélida la ékrir Justin :

Mon shèr nové, mon spès salté rouj-de-fon dovan l’étèrnité, kosa i lé ankor sa ? Kosa zot la invant ankor ? Avèk mon voizine moin lété apré diskité é ni domann an nou mèm, kosa i lé so komité d’parénj ? Kosa sa i ansèrv in n’afèr konmsa ? Kosa sa i ansèrv si Paul Vergès lé pa kandida pou lo zéléksyon. Li l’avé ka ète kandida konm in bonpé d’moun, aprésa li noré pa bézoin fé son komité. Kosa sa ? I sort par la porte, é i ar-rant par la fénète ? Sansa i ar- invant l’izine a gaz ? Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, moin lé pa dakor avèk out fasonn oir lé shoz ! Kosa sa i lé pou nou ? Dabor pou bann kominis sa i vé dir nan dmoun z’ot parti é anparmi Paul Vergès i roprézant azot dann la kanpagn. Z’ot dirizan lé la li osi ! Aprésa l’inyon sé pou vint-an pars sa i vé dir nana vin z’ané pou romète l’ord dann la mézon Rényon. Arzout èk sa nora in komité sharjé pou fèr lo travay de fon é sa lé bien nésésèr a koté d’sak nana lo né dann motèr. Ou la konprann amoin-la ? Na poin pir sour ké sak i vé pa antann ! Tok ! Pran sa pou ou !