A ! Mon bann dalon, moin lé sir zot va trouv sa in pé bizar toulbon. Dabor pars sa in n’afèr i koul de sours : i fo néna la tète pou korn pous dési. Sa lé koni é arshikoni. Mé si li lé konm mi di, pou kosa i anparl de sa ? Pèrsone la zamé di touléka dovan moin lo korn i pous aprésa sé la tète. Mé a bien kalkilé, néna in l’ord normal dann la natir é sak i réspèk pa so l’ord normal lé riskab fé kass azot ti-boi. Moin lé éné, mi grandi épi mi mor : normalman pou toulmoun lé konmsa. Mon dan d’lé i vien dan mon boush avan mon dan définitiv. In flèr, avan rouvèr li sé in bouton. Etsétéra-étsétéra. Donk, mon kozman an-o la i sava pa tro loin sof bien indik anou lo l’ord bann shoz… Alé ! Mi kite azot rofléshi la dsi é ni artrouv pli d’van . Sipétadyé !.