Apré z’éléksyon sénatèr, la télé la intéroz Paul Vergès pou dmann ali pou kosa son list la gingn san voi an moins sak lété prévi. Li la réponn, sé par rapor la korupsyon. Bien antandi, la pèrsone la koz sanm li la pran in èr intérésan pou bien amontr èl i kroi pa sak nout kamarad i di, san fé in l’éfor pou konprann. Dopi sa, lo tan la pasé. Firamézir, sak i vé i pé rann ali kont par li mèm ousa ki sort la trayizon, soidizan pou in pé amontr zot lé kont la politik l’inyon, sansa la politik nout parti, sansa ankor kont Paul Vergès an persone... mé fransh vérité, pou défann son z’intéré partikilyé mal kashyété.

Mé kan ou i bord out prinsip-la, afors abandoné, ou i koné pa ziska ousa ou i pé alé. Shak foi ou i pé trouv in l’ésplikasyon k’i vo sak li vo, sanm pou moin pa granshoz, mèm arien ditou, mèm pa son poi an kaka sèk. Shak foi ou i pé trouv in rézon, k’i vo sak li vo, sanm pou moin pa granshoz, mèm arien ditou, mèm pa son poi an kaka sèk... Samdi, l’avé in gran rényon l’ékip Gironcel. In pé pli loin, mé pa tro, l’avé in rényon in list trayiszon. In madam la vni koté la rényon Gironcèl pou propoz désèrtène pèrsone kit la rényon pou alé dan la rényon trayizon. Inn-dé kamarad la mèm di, lo madam té i propoz demoun l’arzan, é té i amontr son sak in èr d’dir nana lo pourkoi la-dan.

Lo réspé la dignité d’moun, sa sé in prinsip nout parti, konm lo réspé la parol doné. La koripsyon, sa in n’afèr i trouv an takon an parmi nout bann z’advèrsèr, pa dann kan la rézistans bann Rényoné. L’abandon in prinsip i apèl l’abandon d’ot prinsip. Konm di lo kont, i sava pir-an-pir, i dsann kap an kap, ziska tonm dan la tay batis koko sèk.

Justin