Matant Zélida la ékrir Justin :

Mon shèr nové, mon spès salté, rouj-de-fon dovan léternité,
si mi konpran bien, sanm pou moin, zot i fé pa tro in ka ansanm lo zéléksyonn mèr ! Lé vré zot i anparl de sa, mé pa si tan tèlman. Pétète zot i pans la pa in zéléksyon va nyabou shanj lé shoz La Rényon : si zot i kroi pou vréman nout péi nana in kantité gro-gro problèm i gin ar pa trouv in bon solisyon, pétète zot i pans la pa sa konm ki diré va kass lé kat pat in kanar épi va pèrmète anou règ in pé nout bann problèm donk pou zot la pa lo zéléksyon va amèn anou dann bon shomin. A moins ké, bann rouj i pans lo zé lé fé, é zot poi lé o fé par la mèm okazyon. si sé sa sé plito in bon nouvèl. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, mi san bien, ou lé pa kapab anpèsh aou amontr out mové léspri. M’a réponn aou mé san tonm dann out pyèj si posib... In késtyon pou komansé : kosa la éspas lo pli inportan la zourné yèr ? Biz-biz dan la droit Sin-Dni épi Sin-André ? Trafikaj larzan dann konsèy zénéral, osinonsa lo tourné-viré dann foiyé tèr rouj... Antansion, mi i pa sak la éspasé la-ba lé pa inpoirtan, é ki fo pass sa profi é pèrt pars sé kant mèm lo sign ké la sosyété lé malad é ké ganidan la pa asé pou géri ali.. Mé si ni kalkil kosa la éspas inportan mardi lo 17 désanm, moin pèrsonèl, m’a mète an promyé la manifèstasion bann plantèr pars na in sèryé ménas i pèz dsi nout lékonomi é lo fon dé shoz sé kant mèm lékonomi. nou na in sèryé problèm dévlopmn ékonomik é si ni trouv pa in bon solisyon lé sir nou lé moungé.

Kosa i sa éspas konm zafèr inportan zordi ? Lo promyé anivèrsèr la shart l’èrmitaj pars sa i vien zis a tan pou bien fé romark anou lo léshèk nout intégrasyon dann lo modèl fransé. Oplis i sava, oplis léskhèk i agrav ! Oplis i sava, oplis ni oi pa vnir lo vré solisyon. Olèrk donn nout tout konm i di in lasansèr sosyal, l’apré fé dégringol la mazorité d’moun dann ba fon la sosyété...Ala mon répons matant, Dakor,la pa sète la télé, la radyo ou sinonsa bann zournal la droit, mé zistérézon sé kant mèm sak lé pli inportan pou l’avnir nout péi.. Tok ! Pran sa pou ou !

Justin