Oté

Kosa lo pèp i domann ? Bouzaron plin épi l’amizman ?

Justin / 11 zwin 2018

JPEG - 43.6 ko

Néna désèrtin moun na lo pouvoir i pans konmsa. Zot i pans, inn foi demoun lo bouzaron lé plin, épi néna l’amizman lo pouvoir néna la pé : la pé pou kontinyé rann pli rish sak lé déza pli rish, pèz atèr sak lé déza atèr sansa ankor pli mové pèz atèr sak lé déza pli ba k’la tèr.

Moin la vi dsi internet in krobar-i paré sé konmsa i fo di sa-in karikatir si zot i vé. Néna dé bononm dosi : inn sé lo prézidan Macron é l’ot son promyé minis. Lé dé i fé l’èr zot lé kontan. Mi dispans azot lo tèks néna dan la bul pars konm k’i diré tèks-la lé in pé éspésyal. Pou kosa zot lé kontan ? Pars katorz zyin i sava arivé é avèk lo katorz néna galman lo komansman la koup di mond foutball é kan néna i paré sré lo lokazyon pou pran tout z’ot désizyon pou fé pass z’ot mové konplo. Donk la koup di mond foutbal sré lo lokazyon pou avans dsi la rout moin la mark an-o la.

I parétré, mé sa moin lé pa sir, lo prézidan bann patron la donn gouvèrnman tout in katalog bann mézir li vé gouvèrnman i pran-vitman vitman - pou kontant bann rish.

Mé moin lé a d’mandé si lo pèp lé vréman kontan avèk sak moin la mark an-o la. Akoz in pé i yèmré pa la kultur an plis ? Akoz in pé i yèm ré pa sinploman gingn in boulo-donn kréol travaye ! Sa la pa in mo d’ord la CGTR la trouvé é néna in kantité d’moun lé dakor avèk sa é alon pa obliy sé zour isi la CGTR fète son sinkantan. Akoz in pé i yèmré pa sinploman avoir la dignité an plis, épi la libèrté, épi la rokonésans z’ot rol dann la sosyété ?

Akoz in pé i yèmré pa sinploman la révolisyon ? Oui, la révolisyon, kékshoz i pé ranvèrs l’ord ansien. Nout kamarad Denis Irouva i shant pa dann bann défilé : « Le monde va changer de base, nous ne sommes rien, soyons tout. ». Ala in n’afèr pou réklamé ! Zot i pans pa ? Ala in n’afèr demoun i pé réklamé, mèm si néna la koup di mond foutbal.

Moin, pèrsonèl, moin noré in kantité z’afèr an plis ké sak banna i ofèr amoin pou moin réklamé. In l’èr pli pur, in l’anvironeman pli korèk, in sistèm santé pli valab, la bone mizik, l’umour, l’amour-akoz pa !- mé mi pans nout sosyété lé si tèlman inzis ké li anpèsh amoin an avoir sak mi vé an avoir. Mi pans zot osi i doizète dann in ka konmsa. Mé pétète mi tronp in pé, mé pa bonpé kant mèm.

Nb Panem et circenses (dopain épi bann zé) konm bann romin l’antikité té i di.