Mardi aprémidi, la fé in louanj pou Paul Vergès dann Sénat La Répiblik, é d’apré sak moin la antann, inn foi an plis, la bien konplimant sak li la fé étan vivan… pou son rol pou La Rényon, pou la frans épi pou son rol pou lo mond antyé. Donk i fo, si mi tronp pa, konsidèr Paul Vergès konm in moun dévoué pou La Rényon, dévoué pou La frans épi dévoué pou lo bonèr l’imanité.

Pou kosa mi di sa ? Pars Paul Vergès la touzour di li lé pou in l’inyon rant toulmoun lé désidé travaye dann l’intéré zénéral é pa arienk dopi zordi, ni yèr, mé dopi in bon takon d’zané. Solman, moin la vi souvan dé foi, in bann moun bien okipé a poz lanspèk pou anpèsh nout péi pou avansé. Pou kosa ? Pars sé Paul Vergès té i di sa ? Mi pans ké non, vi tout sak, tout demoun i di zordi apré son mortalité.

Zordi li lé pi la é son bann kontinyatèr i di partou, dann konférans de prèss konm dann z’ot diskour zot i vé kontinyé la politik Paul Vergès épi son métod azir par l’inyon. Zordi la diréksyon lo PCR, i propoz toulmoun pou marsh ansanm dann l’intéré nout péi… Si lé vré ké sé lo shomin k’i fo pran. Si lé vré ké l’éstratézi d’inyon sé sate i fo pou nou.

Alor, kosa i atann ? Kosa i atann ankor, pars oplis lo tan i pass, oplis la sityasion i aranj pa é lo bann solisyon i vien pli dir pou apliké. Alor, bann rényoné i atann é lé pa bien d’fèr atann azotankor konmsa.