Mé zami, na poin tro lontan moin té apré rogard zoinal parlé dsi Télé la MBC é lo minis lékonomi té apré réponn késtyon bann moun té i poz. Zour-la téi anparl l’aye, zognon par tète, épi Pom tèr. Demoun té i souplègn pars dann bann komèr s téi trouv bann produi-la tro shèr, sansa téi trouv pa ditou : l’avé in mank, é d’apré sak i di bann spékilatèr l’avé éstoké.

Donk lo minis téi asplik bann mézir lo gouvèrnman la pran pou shakinn gingn in minimom sirtou dann in pèryod konfiinaz é té i di lo pri taksé par gouvèrnman. Mé bann zoinalis la sèye mète an dout son parol é afors pik ali avèk zot késtyon, momandoné lo minis la près pète in kab. Solman li la gard son kalm é sé li k’la mète lo moun an gard é oila a popré kosa li la di : zordi demoun i di lé tro shèr, é li pans i pé z’ète vré sirtou dann in pèryod la rarté sé la loi é li domann si lo moun la kalkil in pé kosa lé posib arivé si néna ankor in nouvo vag lo covid 19. Li la d’mandé si noré té pa pli saz, plito ké titiye ali, demoun i sava plant in pé sak zot la bézoin plito ké kontinyé ashté avèk bann péi déor.

L’èrla, sa la fé pans amoin La Rényon pars isi galman demoun i s’an plègn lo pri l’aye, lo pri zognon, lo pri Pomtèr, é moin la dmandé an moin mèm kosa v’arivé si bann marshandiz i ariv pi konm k’i fo : par égzanp dori, lo blé, épi zépis épi tout sort marshandiz i ranpli nout boujaron ? Onzèr moin la ékout dann télé vietnam la déside frène in pé bann z’inportasyon dori. La déza fine ariv pou l’Ind, in pé i s’anplègn dann l’aye épi zognon néna lo d’javèl. Talèr lé posib mèm sa nora pi.alor kosa k’i rèss pou fé ? Li la poz késtyon san réponn pars d’apré li sa i tonm dsou résponsabilité minis l’agrikiltir.
Mi koné pa kosa zot i anpans mé la sékirité alimantèr, kon m i an parl dann program nout parti sa sré kékshoz a batir sa pou nou. Lé déza in pé tar mé la pa tro tar.