Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Kossa i amenn lo monde ? Lo santiman sansa l’intéré ? Pétète i fodré ni rouvin pé noute zyé

mèrkrodi 14 févrié 2024, sanm Justin


Mézami kossa zot i diré si in péi dann l’Azi sansa in péi dann l’Afrik téi sava akapar inn-dé zil dann la Manche sansa la mer di nor pou kontrol la navigassion ?


Zot i diré sirman : kossa banna néna pou fé anlèr laba ? Akoz pa rèss landroi zot i lé ? Akoz pa kontrol la navigassion dann la mèr koté landroi zot i rèss… kissoi lo kanal Mozambik, kissoi lo détroi Bab èl Mandèb, kissoi ankor lo bra d’mèr rante Sri-Lanka épi l’Inn, la mèr rouz é si é sa.

Ni pouré miltipliye la bann ka konmsa pou étone anou, é pou krétik lé z’inn épi lé zot.

Mi koné zot koko i tourn kar d’tour pou domann kossa l’ariv amwin — kossa l’ariv Justin zordi ? Pou kossa mi anparl sa é sète fasson-la. Poitan sa sé in n’afèr k’i éspass sou noute zyé é ni domann pa nou arien. Mèm pa pou kossa La franss lakapar bann zil zépars ? Pou kossa li la kapar Mayotte ?

Pétète bann maoré i panss La franss i yèm azot é sé pou sa ké li tourn li vir partou tèrla dann noute losséan indien. Pétète zot i panss boudikonte La franss néna arien a gagné pou kontrol toussa bann santènemil marin.

Zot i gnor pa sé par nou La franss sé in gran puissans maritime. Zot i gnor pa sa i fé dé mil é dé mil fon marin épi toute bann rishèss néna dodan — mi domann amwin si nou rényoné, si bann Mayotte, épi d’ote ankor, i oi la késtyon avèk lo mèm rogar ké bann dominèr.

Mézami lo monde i diriz pa solman avèk lo santiman, mé avèkl’intéré é sa sé in n’afèr i fo pa ni obliye.

A bonantandèr salu !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus