Toultan ké bann difikilté i konssèrn arienk nout vi kotidyène, ni pé alèz ranvoye la résponsabilité dsir lé z’inn é dsir lé zot.Rant kréol mèm ni ézite pa amontre lo doi nout bann konpatriyot épi zot manyèr viv, konm zot manyèr konsomé, voiyazé, boir d’lo. A ! dsi la késtyonn lo néna pou dir parébzanp dsi la kantité ni konsome.. Lé pli préférab dir sa ké ral zorèye bann pouvoir piblik pou la fasson i amenn dolo nout kaz an ranvèrssan la moityé dann shomin.

Mé toudinkou kan i ariv in gran lévènman nou lé pou arien ladan, wala ké nou lé bien dézanparé.Par égzanp kan la guèr i pète épi ké nout kotidien lé riskab pi ète assiré.Kan san rézon, dsi la baz in mansonzri zétazini i mète a kass-briz in péi konm l’Irak pou konète oussa li kashète son larsénal nikléèr.Kaziman alé rode la tète la mori pars lo péi na pwin sak i di li néna.

Apré i atak l’Iran épi l’Iran i oi pa lé shoz konm bann zagréssèr é i ariv sak i ariv koméla : bato pétrol i pass pi dann détroi d’Ormuz é nou lé in bonpé pou ète dépandan d’in n’afèr nou la zamé vouli d’ev ni d’Adam…So kou issi ni di nou la zamé vouli in sossyété konmsa, in mond konmsa, in manyèr viv konmsa é ni ral grav siouplé grav mèm !

Alor ni pé krétik nout bann konpatriyot konm ni vé- kréol i pé krétik kréol- mé kan ou la pwin mèm in myète de pouvoir, in pti gine lo kontrol dsi ou mèm kan wi pé pa viv an pèp adilt boudikont ébin kossa i rèss pou fé sirtou si konm i di néna kalité danzé i plane dsi nout tète é nou lé totalman san défanss…Mi poz la késtyon, mi poz pa lo réponss.

A bon antandèr salu !

Justin