Dalone, dalon, i parétré la lanpe Thomas Edison la invanté néna pliss in syèk i kontinyé fonkssyoné zordi ankor é sé kan bande kapitalist la vi sa ké zot la désside program toute zot afèr pou mète anndan in date de fin tèl sorte ké oute trin i tonb an pane é lé pa possib réparé pou in pri normal.

Si ni romarke bien in bonpé loto koméla lé programé pou roul dizon san mil kilomète é si wi roprograme pa zot zot i tonb an pane ziska ké wi trouv lo bon garaziste kapab roprogram ali avèk in klé fourni par l’izine. Mé si ou lé blé dann la mékanik épi léléltronik i rèss aou arienk pou shanj véikil bien kontan si ou la tir oute kolé dann la d’in kékshoz konmsa.

Pou kossa mi di toussa ? Pars mi antande souvan dann radio bande famiye i profite lalokassion rantré skolèr pou shanj kissoi zot frizidèr, kissoi zot télé, kissoi in laparèye toulmoune zordi i konsidère konm indispansab ; sirman dsi la mass demoune sa la pa vré, mé lé vré wi oi sé tan-si kék frizidère déviré dann bordaz shomin la porte rouvèr alor wi pé kroir demoune i sava shanj sa pou l’plézir alé oir sé par nésséssité.

Toute fasson, mwin la romarké la krétik lé zot lé fassil mé pou ou wi trouv toute kalité zistifikassion. Mi poz azot in késtyon : si zot lav-linz i tonb an pane zot i fé réparé sansa zot i shanj ali . Réparé lé possib mé lé possib ossi sa i koute aou lo pri d’in nèv avèk lo danzé k’i fonksyone pyang-an-pyang é avèk in nèv sak lé sir sé ké wi agrav la polission é sa lé pa bon, pa bon ditou.

Alor kèl shoi zot i fé ? Mé lé vré lo sistèm ékonomik kapitaliste lé fé tèl fasson ké li pouss aou dann la konsomassion é a oute fasson, ou ossi, wi mète la vi lézom an danzé dsi la planète mé zot i koné toussala é mi sava pa fé azot in prèshi-présha .

A bon antandèr,salu !

Justin