Mézami koméla dann noute sossyété néna bonpé d’moune i panss zot sé lo zonm (sansa lo fanm) d’akssyon. Antouléka zot i fé valoir azot konmsa : zot i aji, zot i fé… é zot lé pa demoune i bate solman la lang.

Poitan néna kékshoz k’i éklèr l’akssyon, sé la diskission. Dizon sa lé konm lo rapor rante la téori épi la pratik. Mwin pèrsonèlman mi diré i fo inn épi i fo l’ote, i fo la téori pou éklèr l’akssion, é i fo l’akssion pou vérifyé la téori é pou don in rézilta.

Donk kan mi domande in moune kossa li rakonte, mi atande li rakonte amwin kossa li rakonte pou vréman é dann kèl l’akssyon li lé angajé si li vé bien dir amwin… Rante la téori épi lakssyon na poin séparassion final de konte. Néna l’inité.

Alé ! ni artrouv pli d’van. Sipétadyé.

Justin