Dabor l’avé in famiye kréol kom mwin konm zot, la vni ashète karote. Lo vandèr la domann lo madam si èl téi vé grade lo bann tij — lo fane iapèl sa — le madam la garde lo bazardié an koulou épi la di : mi vé arienk lo karote pars la kaz mwin la poin lapin.

Apré sa in n’ote madam l’arivé, èl ossi l’ashète karote mé èl la domann lo bann tiz. Aprésa èl la di èl la bézwin lo bann fane pou fé la soupe épi èl la done dë troi mo lésplikassion pou di koman èl prépar son soup. Shakinn son lidé issi ba dsi latèr.

Sa i fé panss amwin in n’afèr mi panss lé vré. Pétète pa toultan mé in pé kan mèm. Sète afèr-la sé ké mon zénérassion lété in bann gaspiyèr pars mi rapèl bien la kaz ossi nou l’avé mantalité-la : nou téi gaspiye in bonpé nou téi fé pa léfor k’i fo pou tir lo pliss possib kissoi dan in paké karote, sansa in paké brède, sansa ankor in pé toute sorte léguime.

Zordi mi koné néna pou tiré dann in paké brède chouchou si li lé bien triyé ; — défoi mi rogrète kan i fé rougaye mang é k’ik zète la po pars sanm pou mwin sé dann la po néna lo pliss vitamine é souvan défoi mi lir sa dsi linternet. Mi rogrète lo bazardyé i pran pa son tan pou bien éspliké pars défoi si i gaspiye sé par ignoranss.

Kan wi koné pa wi koné pa. Kan wi gaspiye la pa par lanvi d’gaspiyé mé par ignoranss mi panss lo bazardyé i doi fèr in pé la pédagoji ;

A bon antandèr, salu !

Justin