Zordi nou pa pé maziné koman nout bande zansèt la fé pou ténir ansanmb, malgré lo kou, malgré travaye dir, malgré lo Sagrin zot propre péï. Non, nou pé pa mé nou pé rann à zot Omaze.

Na bonpé y sa fé kabar, la fèt, y sa fé dézord pou pa nou oubli nout passé, sa in nafer importan ! Na dote y wa sa kom in komba politik, y préfère fé conférense, sobatkoz, pou en aprann ankor plis dessi nout passé, sa osi lé importan ! Épi na osi bann sindikalis y bataye ankor é touzour pou fé ke le 20 désanmb lé vréman in zour férié, in zour y travay pa ! Mi pense sa na son limportanse osi. Si nou réfléssi bien, nou dovré pa travaye lo zour là, kom in symbol, pou tout lo tan nout zansèt la travay gratui pou fé plézir gro patron ek ti kolon. Zordi travayèr ossi lé konm in zesklave. si li té pa oblizé li ossi noré ress son kaz ou bien noré kraze in maloya.
Nou na in pensé ossi pou toute sèt la soubat pou la rokonéssans lo 20 désanmb par léta fransé. Té pa fassil mé zot lavé in konviksion é zot la réissi. Sé grasse à zot si lo 20 désanmb lé férié.

Alors 20 desanmb fé sèt na po fé, mé sirtou allons onor nout zansèt ke la permèt à nou awar lo péï nou nana zordi ek in filozofi y respek toute nation y vive issi malgré la soufrans déssertin.

Ni artrouv.

Justin