Matant Zélida la ékrir Justin :
Mon shèr nové, mon spès salté, rouj-de-fon dovan l’éternité,
Moin lé a d’mandé kosa zot i vé. Zot i krétik madam Dindar apré an avoir sèrv zarboutan pou èl dann difikilté. Zot i krétik zot partizan apré an avoir sèrv marsh-pyé pou banna. Zot i krétik mèm gouvèrnman la Frans apré an avoir di zot lé dan lo mazorité prézidansyèl. Mi domann si dmoun i suiv azot lé pa riskab tonm a-tèr dann viraz tro séré zot i anbèk tout vitès. Astèr demoun l’apré kas zot tèt pou konprann kèl koté zot i lé par rapor lo nouvo gouvèrnman la Frans. Zot lé dan la mazorité ? Sansa an déor ? Sansa ankor dsi koté ? Boudikont, kèl koté zot i lé ? Mi pans, afors fé z’akrobasi, zot parti va fini par èt in koté. I fodré kant mèm pa, pou zot, li tonm dan lo koté d’tanto. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, si ou té i égzis pa, noré fali invant aou,
Mi konpran kosa ou i di kan ou i anparl koté d’tanto. Ou i pans, nout dèrnyèr èr lé fine arivé ? Alon pa kas la tèt pou sa, mé plito alon gard in kou la vérité an fas. An tou-tan, Parti kominis l’amèn sak i apèl in politik l’inyon, é li la fé l’inyon avèk sak, solon li, lété k’i sèrv z’intéré La Rényon épi bann Rényoné. Moin, mi pans, souvan défoi la pèrmèt anou ranport inn-dé viktoir, gingn inn-dé konba. Biensir, nou la fé l’inyon avèk bann mouvman in pé tout tandans, mé kosa k’i ansèrv anou fé l’inyon èk nou mèm ? Touléka, sa la pèrmèt anou pa disparèt, fé avans in pé nout z’idé, é mèm transform nout péi dan plizyèr séktèr, kisoi l’ékonomi, kisoi dann lo sosyal, kisoi lo transpor, kisoi ankor lozman, épi la kiltir. In pé plis nou té i kroi mèm sa té i doi pèrmèt anou kol shomin nout dévlopman. Lé vré, zordi nou la kal in kou, mé konm i di, si nout lign lé just é si ni gingn viv an parmi lo pèp konm poison dan l’o, koté d’tanto, la pa ankor pou koméla. Tok ! Pran sa pou ou !

Justin