Kosa i lé in bèrtèl ? Dizon sé in sak trésé. Mé pa arienk sa : dann tan téi mète sak lé pli inportan pou in onm. Lontan demoun l’avé poin in ta d’zafèr mé l’avé lo pli nésésèr. Kosa par ébzanp ? Out méyèr zoutiy, donk out gran kouto sansa out fosiy, osinonsa out fangok. Out goni pou anpar la plui ! Out gouté pars san gouté la fors na poin.

Zot i oi kosa sé lo pli inportan ? Mé lo pli inportanké sa ankor pou in boug kosa i lé ? Sé sak i ède ali bien, sé sak i soutien ali dann la difikilté, sak i konsol ali dann la détrès. Donk sé son madam é in bon madam lé touzour par koté ou. Sansa la pa in bon madam !

Zot va dir amoin sa lé rar ? Oui sa lé rar si ou i shèrch pa asé ou i trouv pa. Pars pou trouvé i fo shèrché. Otroman ou la pa pou trouvé é out bèrtèl sar vitman défonsé.